關於部落格
淚,是寂寞的光嗎?

  • 12674

    累積人氣

  • 0

    今日人氣

    0

    追蹤人氣

踏話頭──伊kap伊所愛ê島嶼kap島嶼所愛ê我

慢慢á,阮發覺這是m̄是愛情,無hiah重要,重要ê是,逗陣作伙hit種互相扶持ê溫暖,就價值一世人去珍惜kap追求。幸福,m̄是寫tī小說內面ê浪漫愛情,幸福是鋪tī現實生活面頂ê點點滴滴,幸福是bih tī眼神交流ê時時刻刻…… 總是嘛愛感謝秋天ê雞婆,因為秋天ê風,吹來伊ê腳步,hōo阮一步一步,tuè著伊ê形影,行去愛ê世界。有愛,才有詩;有詩,阮才有法度,帶著美麗kap慈悲ê心情,tī這塊流浪ê島嶼行踏,有時遊山玩水,有時放浪街頭,有時嘛行入去茫茫渺渺ê歷史內底。攏是為著伊。 為著伊,kap伊所愛ê島嶼,kap島嶼所愛ê我,阮開始思考,beh用啥物來紀念kap維持這段複雜ê感情,以及感情以外無法度形容ê溫度kap曖昧,tī山水之間,tī愛kap m̄愛ê中央,雖然難分難捨,m̄過,這種心肝ê躊躇就是靈魂ê燈火,因為有火籽,無完滿ê性命,才有向前行ê勇氣。 對台語ê心情,嘛是這種躊躇。台灣所有族群ê母語,因為政治kap歷史ê因素,長期被打壓、迫害kap thún踏,阿母教阮ê話,竟然變作一種悲情,講kap m̄講,攏無可奈何。假使若beh寫,愈無可奈何,m̄知beh位toh位寫起,真濟ê字詞,早就tuè祖先行入去墓á埔;koh有真濟ê字詞,散tī風中,阮無力ê翅胳,tī茫茫ê天頂尾溜,嘛m̄知beh去toh位tshuē。尤其我是一個「福佬客」,一個被福佬人同化ê客家人,阮ê母語,koh加一寡á複雜ê gāinn-gio̍h,但是gāinn-gio̍h歸gāinn-gio̍h,tī現實中,一個事實是確定--ê,就是,各族群祖先傳落來ê話kap文化,攏總漸漸作伙行向死亡ê界線…… 阮目睭金金,除了無可奈何以外,亦是無可奈何。所以,只有kā心內ê珠淚化作歌詩,用母語慢慢呼喚,呼喚流tī爸母血汗內底ê溫暖。對伊,對愛情,嘛是kāng款ê心情,阮tshuē無比詩koh khah溫暖ê物件啊。 只是,阮對伊ê呼喚,m̄知伊有聽著無?嘛m̄知上帝有聽著阮對愛情ê呼喚無? 你kám知影?Tsia ê呼喚,tī每一個想伊ê暗暝,攏是太平洋ê水湧,一聲一聲,用歡喜ê節奏,拍著島嶼ê海岸…… 你應當有聽著吧?Tsia ê詩,嘛是島嶼ê戀歌。這幾年來,阮ê腳跡帶著美麗ê心,行過島嶼ê一切一切,風風雨雨,安安靜靜,阮ê身軀,有時陣嘛變作一座島嶼,倒tī伊滿滿ê思念內面。 阮相信世間ê愛情,亦m̄是啥物完滿ê物件,所以,阮beh koh去愛這個無完滿ê世界,kā愛擴大,無私心ê愛,才有幸福ê可能,自由、公義、和平ê追求,大自然、宇宙ê懷想,甚至對一蕊花小小ê m̄甘kap欣賞,內面,攏有愛伊ê形影…… (陳胤/2009/11/17) 註解: khn̄g:『放置』。 gāinn-gio̍h:『尷尬』。
相簿設定
標籤設定
相簿狀態